Build-A-Bear bangsaverksmiðja opnar í Smáralind

Það var hann Kjartan Flosi, fimm ára sem aðstoðaði lukkudýr Build-A-Bear við að klippa á borðann og opna formlega verksmiðjuna og fékk í kjölfarið að vera fyrstur til að útbúa sinn eigin bangsa í Hagkaup Smáralind.

Í bangsaverksmiðju Build-A-Bear gefst viðskiptavinum tækifæri til þess að búa til sinn persónulega bangsa en mikið er lagt uppúr upplifun og því að skapa minningar sem endast út ævina.

,,Það var mikil spenna hjá viðstöddum sem voru mætt hér í Smáralind allt að klukkutíma áður en við opnuðum. Við erum virkilega þakklát fyrir viðbrögðin og þolinmæðina því viðskiptavinir lögðu á sig töluverða bið eftir því að komast að. Álagið varð að vísu svo mikið um tíma að áfyllingarvélin sem fyllir bangsana bilaði, við þurftum því að handfylla bangsana í smá stund og orsakaði það smá spennu á allan hópinn. Við þurftum aðeins að biðja viðskiptavini að hinkra meðan verið var að greina bilunina en allt gekk upp á endanum og við segjum fall er farar heill.” Segir Lilja Gísladóttir sérfræðingur markaðsmála hjá Hagkaup.

Eftirvæntingin fyrir Build-A-Bear var svo sannarlega mikil en þegar starfsfólk Hagkaups opnaði kl.12:00 á sunnudag hafði myndast löng röð fyrir utan verslunina og þar varð annar stór og skemmtilegur bangsadagur í Smáralind.