Stjörnustílistinn Þórunn Högna elskar að skreyta fyrir jólin
Heimili & hönnun - 12. desember 2024
Sjálfskipaða jólakúlan og stjörnustílistinn Þórunn Högna er jólabarn af guðs náð. Við njótum góðs af að vanda en hér leggur hún á borð fyrir HÉRER og gefur okkur góðar hugmyndir fyrir jólin.
Þórunn Högna, listrænn stjórnandi Icewear og stílisti, er mikið jólabarn sem elskar að skreyta fyrir jólin.
Uppáhaldsbúðir Þórunnar til að finna fallega hluti fyrir jólin eru H&M Home, Søstrene Grene og Epal í Smáralind.
Þórunn Högna jólabarn
Þórunn er sjálfskipuð jólakúla enda elskar hún allt í kringum jólin og er snillingur í að skreyta og gera fínt á heimilinu. Hún er aldrei með sama þemað tvö ár í röð en þetta árið urðu súkkulaðibrúnn litur, kamel og beis fyrir valinu, sem hún blandar við gyllt og grænt greni í bland.
Tauservíetturnar úr H&M Home, skrautið frá Søstrene Grene og grenið nýtur sín vel á hátíðarborðinu.
Heimatilbúin aðventuskreyting Þórunnar sem er stjarnan í borðhaldinu.
Brúnir tónar eru klárlega að trenda í ár en líka þessi dökkgræni (eins og greni) sem er mjög falllegur. Svo er líka auðvelt að nota aðra liti með eins og hvítt, rautt og blanda græna með. Leika sér aðeins með litina, en fyrst og fremst að skreyta eins og manni finnst fallegt, ekki alltaf að elta öll trend!
Þórunn elskar auðvitað líka að skreyta sjálfa sig enda rennur stílistablóð í æðum hennar. Hér í gylltum sparikjól og leðurslá yfir. Slaufuhælarnir og Saint Laurent-veskið setja svip sinn á heildarmyndina.
Pakkajól
Hér má sjá fallegar hugmyndir að innpökkun frá Þórunni sem elskar að dúttla við hvert einasta smáatriði.
