Heitustu hártrendin 2024
Fegurð - 9. janúar 2024
Hártískan í ár verður rándýr, ef marka má spár sérfræðinganna vestanhafs. Við fáum að sjálfsögðu innblástur frá stílstjörnum fyrri áratuga á borð við Rachel í Friends, ofurfyrirsætum níunda áratugarins og Victoriu Beckham en með fersku ívafi sem hæfir árinu 2024.
Kitty klippingin
Svokölluð kitty-klipping verður líklega vinsælasta klippingin í ár en hún er ný stæling á þeirri sem var kölluð wolf cut fyrir ekki svo löngu síðan. Við erum að tala um styttur sem ramma inn andlitið og lengdin nær sirka niður á viðbeinið. Þessi stíll nýtur sín best vel blásinn með krullubursta (eða Dyson, en ekki hvað!) og er rándýr ef þú spyrð okkur. Góðu fréttirnar eru að þær okkar sem klipptu vel af hárinu á síðasta ári eigum auðvelt með að stela þessu lúkki þegar hárið síkkar. Sú sem seldi okkur þetta lúkk heitir Shay Sullivan en sjón er söguríkari.
Gott dæmi um þá klippingu sem verður hvað vinsælust á árinu.
The Rachel, klippingin sem er innblásin af hárinu hennar Rachel Green úr friends, heldur áfram að hafa gríðarleg áhrif á hártískuna.
Slaufur
Fylgihluturinn, með greini, sem tröllríður hártískunni um þessar mundir eru slaufur í öllum stærðum og gerðum. Möguleikarnir eru endalausir með þennan stelpulega stíl sem gerir svo mikið fyrir heildarmyndina.
Það er sixtís-væb hér sem við erum einstaklega skotnar í.
Ein skærasta stjarna ársins, Sydney Sweeney, með ýkta útgáfu.
Sparislaufa af bestu gerð.
Falleg klemmuspenna notuð aftan á hnakkanum.
80´s pixie
Pixie-drengjakollurinn hefur löngum þótt smart en á þessu ári munu líklega æ fleiri þora að hoppa á lestina. Ofurfyrirsætan Taylor Hill er nútímaútgáfan af Lindu Evangelistu sem sportaði goðsagnakenndu klippingunni á níunda áratug síðustu aldar en hún klippti hárið á síðasta ári, sem er án efa óður til Lindu.
Fyrirsætan Taylor Hill með nýju klippinguna sína en hún segist aldrei hafa liðið meira eins og hún sjálf en eftir að hún lét klippa síðu lokkana sína.
Linda Evangelista lét klippa hárið sitt stutt seint á níunda áratug síðustu aldar og gerði allt vitlaust í tískuheiminum.
Victoria Beckham eða fína kryddið eins og hún var kölluð í denn, sportaði sjúklega smart drengjakolli í kringum aldamótin. Svipuð klipping verður að trenda á næstunni, þar sem tjásulegur toppurinn fær að njóta sín.
Hunangstónar
Ljóskurnar verða minna í platínum en færa sig nær hlýjum og glansandi hunangstónum ef marka má spár sérfræðinganna í hári. Gott dæmi um lit af þessu tagi er á stílstjörnunni Sofiu Richie Grainge.
Rándýr litur á Sofiu Richie Grainge.
Gordjöööss litur á Hailey Bieber.
Styttur
Styttur koma ekki bara vel út í styttra hári heldur eru að koma sterkar tilbaka í síðu hári sem gefur því einstaka fyllingu og líf.
Camila Morrone með áreynslulausa hárgreiðslu með fallegum styttum.
Til að framkalla fullkomið „blow out“ í anda Cindy mælum við með mótunarfroðu eins og þeirri hér að ofan, sem ver hárið fyrir hitanum og gefur lyftingu. Blástu hárið með stórum krullubursta og leyfðu að kólna í velcro-krullum í nokkrar mínútur.
Stuttur toppur
Nú munum við sjá minna af þvertoppum og meira af tjásulegum toppi sem verður eitt með restinni af hárinu.
Nútímalegt og retró á sama tíma. Love it!
Kúl toppur í áferðafallegu hári.
Glamúrus Bob
Bob klippingin er ekkert á förum en hún heldur áfram að vera vinsæl á nýja árinu, nú gjarnan með extra glamúrus ívafi þar sem hárblásarinn spilar stóra rullu. „Old Money“-stíllinn er kominn til að vera. Ef við ættum að velja fyrirmynd fyrir þennan stíl þá myndum við benda á Christy Turlington á níunda áratugnum.
Rándýr bob-klipping.
Vel blásin og örlítið styttri útgáfa.
Hin guðdómlega Olivia Palermo beit á agnið á árinu og klippti hárið stutt sem fer henni fáránlega vel.
Mínimalískt og mergjað á Irinu Shayk.
Fersk útfærsla hjá fyrirsætunni Elsu Hosk.
Christy Turlington á tíunda áratugnum er góð fyrirmynd ef þú ætlar í bob-klippinguna.
Heilbrigði og glans
Í ár munum við væntanlega sjá minna um ýkta líti í hári eins og þann rauða sem var svo vinsæll í fyrra. Nú er áherslan á heilbrigt og glansandi hár og náttúrulega litatóna.
Dásamlegur glans á Jasmine Tookes.
Þetta er náttúrulega bara ósanngjarnt hversu flott Emily Ratajkowski er. Glansandi og heilbrigt hér fellur aldrei úr tísku, svo mikið er víst.
