Sjóðheitir sumarilmir

Q frá Dolce & Gabbana er á lista yfir sjóðheita sumarilmi af góðri ástæðu. Þegar við gengum framhjá ilmvatnsrekkunum í Hagkaup og lyktuðum af Q fyrst gátum við ekki hætt að hugsa um hann. Það er eitthvað ómótstæðilega djúsí við hann og við mælum með að tékka á honum. Q er með dásamlegum ávaxtakeim en kjarninn er viður í bland við Sikileiskar sítrónur og kirsuber. Jömm, segjum við nú bara.

Ef það er eitthvað sem Tom Ford er þekktur fyrir, hvort sem það er hönnun hans eða ilmirnir, þá er það kynþokki. Við fögnum því heitt og innilega að Tom Ford-ilmirnir séu komnir í verslanir Hagkaups í Smáralind enda einstakir með meiru. Í uppáhaldi hjá okkur eru Eau De Soleil Blanc sem er bókstaflega sumar (og sex) í flösku (pistasíuhnetur, appelsínublóm, sítróna og kókos flytja konu til afskekktrar eyju í huganum). Vanilla Sex er einnig ávanabindandi en er ekki kominn hingað til lands ennþá, við bíðum spenntar!

Við verðum að mæla með því að lykta af Polo 67 frá Ralph Lauren. Á dögunum vorum við að leita að rakspíra til að gefa í útskriftargjöf og fórum hringinn í Hagkaup til að lykta af allnokkrum ilmum en þegar kom að þessum vorum við seld. Það er eitthvað sportí og ferskt við þennan en innblásturinn af ilminum kemur úr amerískum hafnarbolta og þeirri tilfinningu sem skapast við leikinn. Sítrus, ilmappelsína og ananas-keimur gefur honum ferskan blæ sem smellpassar eftir ræktina eða sólríkan dag.

Íslenskar konur þekkja Flowerbomb frá Viktor & Rolf vel en nýjasta viðbótin, Tiger Lily, er einstakur ilmur þar sem kókoshnetumjólk, ilmappelsína, tígrislilja, jasmína og mangó spila skemmtilega saman. Þegar þú sprautar honum fyrst á þig skaltu ekki blekkjast, hann er sterkur til að byrja með en þegar hann nær að fara inn í húðina verður eftir hlýr, ómótstæðilegur sumarilmur sem vekur eftirtekt. Viktor & Rolf vilja höfða til sterkra kvenna sem fara sínar eigin leiðir og þess vegna var val á fyrirsætunni, Emily Ratajkowski, fullkomið.

La Belle Paradise Garden er nýjasti ilmurinn frá Jean Paul Gaultier sem er fullkomin blanda af gúrmei-vanillu, blómailmi og púðurkenndum blæ. Þú verður bara að þefa til að skylja!

Hinn sjóðheiti og hæfileikaríki Timothée Chalamet er nýtt andlit Bleu De Chanel sem er tímalaus og óvanalegur ilmur sem hefur slegið í gegn hjá íslenskum körlum. Þessi kryddaði viðarilmur er alger elegans í flösku eins og Chanel er von og vísa og eitthvað sem klikkar ekki við sparileg tilefni.

Acqua di Gioia EDP Intense er nýjasti meðlimur Giorgio Armani-fjölskyldunnar og eins og sést á auglýsingamyndinni er stemningin suðræn og seiðandi. Ímyndaðu þér skærblátt Miðjarðarhafið og ilminn af ferskum ávöxtum á ítalskri strönd. Flaskan er svo listaverk út af fyrir sig.

Prada Luna Rossa Ocean Eau de Parfum er jarðbundinn viðarilmur sem hefur einnig greip og vanilluívaf sem spilar snilldarlega saman svo úr verður sportí en fágaður ilmur í anda Prada. Þessi er þess virði að skoða!

Daisy-ilmirnir hafa verið vinsælir, sérstaklega hjá yngri kynslóðinni og ekki skrítið þegar litið er til umbúðanna og auglýsingaherferðanna þeirra. Litagleði, ferskleiki og frumlegheit eru í fyrirrúmi en við mælum með að skoða nýjustu viðbæturnar: Daisy Pop, Eau So Fresh Pop, Daisy Love Pop og Daisy Wild frá Marc Jacobs ef þið eruð á höttunum eftir gjöf sem gleður yngri konurnar í ykkar lífi. Sá síðastnefndi er í uppáhaldi hjá okkur, sætur sumarilmur sem klikkar ekki! Umbúðirnar eru svo listaverk út af fyrir sig.

Við sem ólumst upp á tíunda áratugnum berum sérstakar tilfinningar til CK One frá Calvin Klein. Nú er komin ný kynslóð sem elskar þennan unisex-ilm og skal engan undra. Nýjasta viðbótin heitir Ck One Reflections og minnir um margt á þann gamla, góða með sítrónu, engiferi, grænu tei og mösk-blöndu sem er sturlað næs.

Hver man ekki eftir Escada frá því á tíunda áratugnum? Ef þú ert að leita að sætum sumarilmi þá myndum við skoða þá nýjustu frá Escada en Santorini Sunset er okkar uppáhald. Eins og nafnið gefur til kynna flytur hann konu til grískra eyja á núlleinni þar sem hann ilmar af ilmappelsínu, mandarínum, jasmínu og með dassi af kryddi til að setja punktinn yfir i-ið.

Guerlain er eitt elsta ilmvatnshús heims og reynslan skín í gegn þar sem vandvirkni og gæði er gegnumgangandi. Aqua Allegoria Florabloom er nýr ilmur úr þeirra röðum sem heillar með blöndu af mangó, möndlum, mandarínum, rósarilmi, kókoshnetu og sandelvið. Þessi er fyrir fágaða.

Miss Dior parfum er elegansinn uppmálaður þar sem unnið er með upprunalega ilminn frá árinu 1947 þar sem jasmína, rósarilmur, viður og dass af mandarínu spila fallega saman, ekta franska sinfoníu. Þessi er fyrir þroskaða og elegant konu sem veit hvað hún vill.