Skrifstofugyðjan slær í gegn
Tíska - 13. mars 2024
Yngri kynslóðin sem er nýkomin út á vinnumarkaðinn lætur ekki bjóða sér hvað sem er og rómantíserar skrifstofudressið. Innblástur frá rómantískum gamanmyndum í kringum aldamótin veita fullkominn innblástur sem og klassískir stílar stórra tískuhúsa á borð við Calvin Klein, Gucci og Prada sem skinu skært á tíunda áratug síðustu aldar. Hér er skrifstofugyðjan sem hefur tröllriðið samfélagsmiðlum síðustu misseri.
Ofurfyrirsætan Gisele Bundchen í hlutverki skrifstofunornarinnar í The Devil Wears Prada frá árinu 2006, fagmennskan uppmáluð í aðsniðinni skyrtu og blazer og gleraugnasniði sem er heldur betur komið aftur.
Innblástur frá tíunda áratugnum og aldamótatískunni
Ef litið er til mínimalískra en sexí skrifstofustíla þessa ára í kringum aldamótin frá tískuhúsum á borð við Calvin Klein, Gucci á meðan Tom Ford var við líði, Donna Karan og Prada, má sjá mörg átfitt sem myndu passa fullkomlega inn í „Office Siren“-trendið.
Steldu stílnum
Hvít skyrta, aðsniðinn blazer, víðar vinnubuxur og támjóir hælar eru staðalbúnaður skrifstofugyðjunnar.
Næntís-sniðið á gleraugum er að trenda enn á ný! Hér má sjá Erin Wasson fyrir Gucci-herferð sem birtist um aldamótin.
Skrifstofugyðjan holdi klædd
Bella Hadid hefur mikið verið nefnd í tengslum við skrifstofugyðjutrendið enda einstaklega flott í dragtarbuxum, sexí skyrtu og vinnugleraugum í anda tíunda áratugsins.
Dökkur varablýantur er ómissandi í „Office Siren“ meiköppið.
Götutískan á tískuviku
Hér eru stílstjörnurnar á tískuviku í nútímalegri útgáfu af skrifstofugyðjuátfitti, þó með dassi af retró-brag.
