Svona kjólar verða út um allt á næstunni
Tíska - 31. mars 2025
Rómantískir chiffon-kjólar paraðir við leðurjakka í yfirstærð með dassi af kögri og klossum er það sem koma skal í vortískunni í ár. Bóhóstíllinn á glæsta endurkomu og við sjáum hann allstaðar - allt frá hátískuhúsum eins og Chloé og Isabel Marant yfir í ódýrari verslunarkeðjur á borð við ZARA og H&M sem voru fljótar að hoppa á lestina og tileinka sér nýjustu strauma og stefnur. Það er alveg á hreinu að vorið verður afslappað og rómantískt með smá villtu vestri í bland.
Tískuhús á borð við Isabel Marant, Chloé, Zimmermann og Saint Laurent tileinka sér bóhóstílinn í ár.
Fylgihlutirnir
Áberandi armbönd og hálsfestar skreyttar litríkum steinum og úr við, flauelstöskur með kögri og kúrekastíll er það sem koma skal þegar fylgihlutirnir eru annars vegar. Leðurjakki í yfirstærð yfir rómantískan kjól er ómissandi og kúrekastígvél og klossar í anda Chloé. Ertu reddí?
Vorlína H&M
Vorlína H&M er heldur betur innblásin af „bóhó“-stílnum.
Mjaðmabelti í anda aldamótatískunnar eru áberandi trend á næstunni.
